要孩子讀書，還是要快樂﹖ 幼稚園面試記二

今天 講第二間幼稚園。

呢間幼稚園標榜的是活動教學，職員說三歲前唔會教佢寫字，透過活動去讓孩子增加學習興趣。

同之前間學校無大分別，一入去就有人歡迎，不過今次係阿伯，之前的全部清一色是女老師或工作人員，阿伯應該唔係老師，但佢都好熱誠同有禮。

我地又係入到去一個大廳，呢到有兒童遊樂場的滑梯，又有音樂閣，又有空地，裏面的佈置完全通過左我的"三歲小朋友安全標準"測試，所有牆壁都沒有一些危險品，可以讓小朋友拿到的東西都是預左的，是玩具，冇危險性，而且其它儲物的地方完全是用不透明有鎖櫃門，小朋友除非識爆破，否則拿唔到的。就算有層架，放的都是紙造的兒童創作，絕無危險品。

不能不讚一讚的是這間學校的壁佈板好"兒童"，因為他們的佈置全是用兒童的手工藝做，除了一些標題是老師做的外，其它的有可能全是兒童創作。還有就是他們的壁佈板不用底紙的，只是將兒童創作釘上去，使我覺既環保，又能夠真正展現孩子的創作。

在我們等候的時間，大家好自由地玩，每隔15分鐘就有一位老師嗌小朋友的名。然後大家集合在一起排隊，再由老師帶去另一個地方。

等左約半粒鐘左右，便輪到我們，嫲嫲好緊張咁不停教阿女當老師叫名時就要嗌"到"同舉起手，但係結果阿女都係唔識，因為老師一嗌名，阿媽就仲快過阿女嗌"到"!

集齊十人之後我地就一齊行去另一邊，那兒放了一個電視機，前面有十張小朋友椅子，放了一套由學校小朋友做的話劇，內容應該係聖經故仔，我仲同嫲嫲，如果讀呢d學校，第日妳可能要幫阿女做戲服，扮牧羊人，魚又或者係樹。

我地睇左五分鐘就被帶入去另一間遊戲室，今次係打人釘人，每一個小朋友都有一個穿 T shirt 同牛仔褲的姐姐拿住一塊板同枝筆。約五個小朋友同埋家長在房間內玩。

我個女去左玩"沙畫"，要介紹下呢舊係乜先，佢係一個燈箱，上面有沙，仲有貝殼，好鬼死靚的那種，有一個貝殼有我隻手咁大，其它的都有4寸咁大，可以用來"不"沙。呢舊野真係唔講得少，因為佢要拉電，有3尺x3尺咁大，我好肯定係自己做的，因為那些邊用膠紙包住。最難得係呢間學校唔怕學生將d沙亂潑。

阿女初時望下望下，因為唔知點玩，我就袖手旁觀，但係隔離兩位家長就好熱切咁教自己的子女點玩，同佢地一齊玩。阿女見到佢地用手指劃圓圈，佢又跟住，有家長用貝殼"不"沙，佢又跟住，我地全程都冇幫過阿女。負責釘我個女的人就話："你個女識觀察喎，睇完就跟住做。" 那位姐姐之後再走埋去我個女隔離，我阿女是站在我們對面的，然後問她，邊過係媽媽呀﹖佢就指一指我阿媽，又問邊個係爸爸，佢又指一指我，最後問邊個係嫲嫲，佢又指一指。

其實呢一題係考父母同子女關係的，可能有好多仔女連老豆都唔認得，因為無時間培佢玩嘛! 淨係識得工人一個!

跟住那位姐姐嘗試帶阿女去第二到玩，阿女又肯跟喎! 阿女跟左佢過去三十秒，玩玩下又走番來"沙畫"呢邊，可能因為我地都企哂係一邊，無跟埋阿女去。唔知咁樣會唔會代表"唔關心"個女呢﹖

最後姐姐拿左一張貼紙出黎，叫阿女揀，阿女初時揀左個已經被人"滅"左的貼紙空位，後來先揀左一個"拿住花的老鼠"，姐姐跟住問阿女貼紙上面係乜，阿女望一望姐姐好似講："咁簡單都唔識﹖"然後答：" 花花" ............ (我諗佢唔識老鼠，因為屋企冇!，屋企只有米奇老鼠!)

跟住我地就被領去音樂室，又係十個小朋友一齊，小朋友坐前排，家長坐後排。今次好明顯無人釘人，一位姐姐放音樂同大家唱歌，然後介紹一位年紀約五十多的婆婆入黎，佢係校長。校長有料到，因為佢扮聲咁同小朋友玩，帶大家唱了首歌，當中叫朋友聽指令，例如拍手，舉手等。不過今次就唔覺有MARK 分。

我估今次係想睇下小朋友在許多人一齊的時候的集體服從性，從而發現一些不合群的小朋友。但係我地的小朋友似乎都好聽話，除左我個女。我個女做左d好特別的事，就係人人坐係到，佢企左起身，不過都只不過係站在自己張椅前面，其它人都坐係到的。

不過唔到十秒，嫲嫲好快就"拉"番佢埋位。可惜! 我真係想睇下阿女的音樂天份麻! 如果走出去跳舞就正啦!

最後校長遂一點名，叫小朋友去枱前面，她只問了阿女一個問題："同校長講BYE BYE 啦" 阿女就細細聲講："校長BYE BYE!"

她的答案簡直係完美。

接著我們便離開了，可惜的是我們沒有收到任何禮物，除了一份該學校的"視學報告書"。

離開時我已經決定左，如果有得揀，阿女要讀呢間學校。

--------------------------------------------------

在面試的過程中我問過其它職員，他們說這所學校今年有400人報名，最多可以收120人，大約係四揀一。我問他們如何決定小朋友是否入讀，她回避了我的問題，但她都答了小小，她說會按學生的不同情度而決定，因為有些發育較早，有些較遲。但我問她那個標準是什麼的時候，她只說是由校長決定，我問校長點決定，她說校長會見哂所有學生，不單是本校，其它三間分校的學生都是她親自面試的。我聽了之後都有些震驚，因為咁樣係好大的工作量，要見千幾人! 相比較另一間學校的校長，佢真係"好做好多"。當然我唔知佢有沒有講大話，但我信佢，因為我親眼看見校長在小朋友面前左"做台戲"，帶班小朋友唱唱歌，我覺得一天要做咁多次，真係係好辛苦的。

除此以外，呢間學校的管理水平絕對係高，因為那些職員的禮貌，室內設計水平，活動設計，面試方式都反映了極高的專業和管理水平。我覺得那位校長絕對是有心人。但她能否帶領所有同工老師一同分享她的理想，相信便是最大的挑戰，因為管理要做得好，也會做死人的，兩者能否平衡，我暫時無法評價。

最後想講，讀呢間幼稚園畢業，孩子便較難適應一般以學業功課為重的小學，所以將來升學的選擇必然少了。我相信若給孩子揀了這一種學校，你便是要給孩子快樂，多於其它一切。當然，這也代表你為孩子選了一條不易走的"窄"路。