博鬥

上星期才說女兒好懂事，這兩天已經化身為"小魔怪"。

由於女兒大部份時間都是嫲嫲和爺爺照顧，平常的喂食都是他們負責，我一般好少理。但由於爸爸要入院，所以嫲嫲也要去照顧爺爺，我便開始學習喂食。

昨天晚一家人在家中，我叫媽媽和兩老先食，我負責喂女兒食飯。嫲嫲煮出來的是糙米飯，再加魚汁同魚肉做餸。結果囡囡食了三口便唔再食，十足我釣魚咁，放絲之後一直無開過口。

我不停鼓勵妹妹食，但佢死都唔食，我俾魚肉佢食，佢又吐番出來，以前明明會食魚肉，但今天又唔食，我火都黎。

同場有兩位老人家及媽媽，我抱著妹妹唔俾佢四圍走，(平常嫲嫲會追住佢黎喂)，阿女就喊出來，跟住老人家又開始俾說話我聽，又話俾番佢黎喂，又話佢仲細。

我每一次都問下阿妹要唔要，我先去喂。我絕對無強迫佢，佢唔開口我都無計。但係妹妹要走去玩，我就會唔俾佢走。我話食飯唔可以四圍走，要坐定定食。佢又會喊。

我又試過拿一些玩具給她玩，但佢只玩而都唔肯食。我話你乖乖食完飯就俾朱古力你食，佢都係唔肯食。

我問阿妹飲唔飲湯，佢話飲，但係到我伸埋佢個口到，佢就用手推我! 搞到我濕哂。我真係火都黎埋!

後來我又再俾佢飲，我話："你試下再推呀!"，點知佢真係推，我就順勢將d湯淋番係佢面到，只不過係一細匙完全唔熱的湯。因為我想佢明白佢做的東西的後果，結果阿妹仲笑，以為我同佢玩緊。

跟住爺爺就話我瘧待女兒，我又要同兩老博鬥，同時又要同女兒博鬥，因為她又四圍走，要拿玩具玩。兩老叫我唔好咁，又話阿女細唔明白，細路仔係咁......

我就話習慣係養成的，每次你們都追住佢黎喂，佢就會覺得咁係啱。

仲有，我最唔鐘意的是阿女食野時，佢一覺得唔鐘意食，就會吐出來。我會教佢要吐在垃圾箱，又或拿紙巾，不可以隨便亂吐。

我曾經見過阿女吐完，爺爺一句都無罵佢，就幫佢抹番地下的東西。我見到當然即時罵。

最後佢都真係唔肯食，當然我放過佢，因為我真係無計。

結果晚上她沒有食飯，我亦沒有給她吃什麼，我相信餓佢一餐唔會死，只要佢感覺到肚餓，就會學識珍惜食物。

我自已亦搞到九點先食飯，當然只係食兩啖就算。

阿女雖然在過程中不斷有喊，最後我問妹妹知唔知道自己唔啱。

媽媽就話："你同爸爸講，妹妹仲細，爸爸慢慢教啦!"

跟住妹妺就邊喊邊講："妹妹仲細，爸爸慢慢教啦。"

事後我檢討番，覺得自己的確唔啱。

好似女兒養成的習慣，不是一天就可以改變的，我不可能一步到位，要求妹妹第一天便做到乖乖坐底俾我喂。

而我亦唔應該用反話："你試下踢呀!" 因為 bb 是不能明白反話的，反而會照住我講的去做，我是錯誤估計女兒的智商，所以我真係唔啱，自己回家後都好內疚。其實這一點我睇書都有講過唔應該，但係已經忘記左。

第三是女兒不應食糙米，這是主要問題所在。

第四是原來爺爺在食晚飯前給了妹妹食魚蛋及雞蛋仔。

第二天中午我再喂女兒，女兒已經乖乖食，雖然她仍然唔食菜，但成碗"網球棒"形的通粉都已經食哂。

今天一早我同女兒講了 sorry ，我問女兒有無嬲，問女兒仲錫唔錫爸爸，女兒話："鍚"

我覺得我幾"好彩"。

附圖是我給我的低年班籃球學生的"表現咭"，我已經給了一張女兒，只要女兒做好，例如有叫"尿尿"，有執玩具，有刷牙，有乖乖食野，咁就蓋一個印，蓋夠五個印，她便有朱古力食。

今天她已食了一次朱古力了! 感謝主!