七一遊行後記 (二) 記者採訪

由於我的年青人朋友自制左件遊行T-shirt，所以吸引了不少"狂蜂浪蝶"要求拍照，但係只影背面!

後來仲有一位記者，手持錄音機想訪問我的朋友。

那位女記者是個台灣人，問我們有沒有聽過"美國之音"，之後就問我朋友點解出來遊行。我朋友指一指自己背脊話：都寫哂係件衫啦。她覺得有小小"無癮"，但相信因為工作需要而繼續再問。

我朋友本來是一個"和藹可親"的人，但可能唔係好了解記者的背景，所以有小小"呼蜆"，一句起兩句止，或者佢唔想"被人利用"。

我見場面咁尷尬，就幫下手答下咀，(其它人唔知點解無幫拖，大家自己估。) 後來佢問朋友可唔可以用普通話講，我就連珠炮發講左好多意見，結果我的四位同僚的面色話我知佢地都嚇左一跳，因為我諗都唔駛諗就可以普通話"爆"出好多對香港政府的不滿，仲要"連綿不絕"，連那位記者事後都話我講得好好。

我講的內容其實無特別，只是講番曾特首講粗口唔認，仲有指鹿為馬地改寫會議紀錄。我話教小朋友都識知錯能改，作為特首卻做錯不認，還有人肉錄音機拿金紫荊章，真係好頂唔順，簡直人神共忿。

最後記者還問我們拿了電話。

朋友跟住話，可能佢地係法輪功的記者。

事實我早就作好了"思想準備"的，因為我每天讀報，心中都已經不停"媽媽叉!"，只不過沒有宣之於口吧了。身為教會導師，在年青人面前又不便講太多政治立場，以免被教會打為"顛覆教會"，所以平時都係唔多表達，去遊行都慣左自己去，以免累街坊。(今次遊行召集人係一位年青人。)

仲有，當我的網誌知道被大陸禁了的時候，我已經作好心理準備。若將來要坐監也是無法，因為自己係信耶教的。另一個原因是若為了這些言論而受罰，相信是一種榮耀。(我的言論是否像似阿蓋達的聖戰死士呢﹖)

人人連真理公義都不顧，結果社會就變成像香港現時的狀況一樣。

若我能成為推動社會改變的囚徒，就像趙紫陽總理，那不是光榮得很嗎﹖

我認為每一位愛上帝愛真理公義的人都應該有一個被囚的思想凖備。

劉曉波先生和零八憲章的合署人，每一位都是將自己的生命作睹注的人，是值得尊敬的。

一個人的勇氣是需要鍛練出來的，香港有沒有希望，就看我們有多少人還願意在壓迫下仍然說真話。

回頭想想旺角差館的強姦案，到底差館內是否沒有一個同僚知道發生強姦案呢﹖為什麼差館內都可以無法無天﹖

曾特首還認為香港警察值得人民驕傲﹖

唔到你唔驚的是，香港不少的年青人還爭先恐後地想去做紀律部隊。