有一位已入小一的家長在入學講座中這樣分享："老師打電話給我說要我管教女兒，原因是因為女兒上堂問問題，唔俾佢答就扁嘴。" 家長被老師責罵說："你的女兒咁幼稚，唔該你教下佢，呢到唔係幼稚園呀!" 我諗唔通扁嘴都唔得﹖ 最恐怖的是這間還是一所標榜基督教的學校，說要效法基督!
又有家長分享某小學小一和小二就讀時女兒都很開心快樂，但小三突然功課勁多，根本無可能追得上，他們的考試卷無人在限時內完成，老師因而要加時兩次，額外俾多三十分鐘。考試的深淺不是應配合小朋友的水平嗎﹖ 怎麼可能會有"加時"這種荒謬的情況﹖
有一間小學的開放日好特別，全間學校無學生返學做義工，老師都係得幾個，d班房大部份都係鎖住唔俾參觀，只係操場擺左幾塊壁佈板。最奇係呢間並唔算係名校。呢間學校係我見過中最不重視開放日的。初時我以為呢間學校的老師會好有空間，可能愛心都多d，但係聽朋友講話佢個仔極唔鐘意間學校，話悶到死。呢間學校仲有個特色，就係校舍好大，佢d課室內的壁佈板個個係一個規劃的，悶到爆，間學校鬼死咁大，但係d學生作品就相對好少。學校的裝飾反映左學校的重視點，好明顯呢間學校不大"學生為本"，重視的是學生是否"乖"。
我參觀過另一間直資小學的開放日，唔單止有講座，仲帶你去四圍行，間校舍內擺放左好多不同的學生藝術作品，給我的感覺就似樣好多! 校園內給人的感覺相當親切，可惜當我和老師談的時候，我就覺得老師都好大壓力。朋友話呢間學校初時係係無乜功課的，但係因為學生家長"投訴"，所以功課亦加緊上黎! 在香港的小朋友真係想開心都好難。
有沒有去過波鞋街﹖ 前後左右不同店名的鋪頭都是同一個老闆開的，其實你看似有選擇，但其實只是在被操控著的假自由巿場機制下挑選。
選小一學校也和這個差不多同理。
由於我女兒性格較為外向，不喜歡死讀書，也不大文靜，所以我心中希望的是女兒能夠去一間不是那麼多功課的學校愉快學習，並且希望能夠去一些較為注重課外活動的學校。但我在深思熟慮後發現在香港除了國際學校就似乎不多選擇了，原因是現時一般的學校 (少數直資和私立學校除外)，都受同一個金鋼箍所套著 ─ 課業成績。
學校成績差就會少人報讀，少人報就會被削資源，所以現時那有學校還能真正"多元智能"和"活動教學"呢﹖ 講這些的學校都係當佢係口號，只是推廣宣傳用語吧! 真正的事實是識背書就能考試升班，課業成績第一位。
當我諗通了這些道理後人就輕鬆下來，因為我根本無須再奢望在沙漠中搵到綠洲。
反而揀一間近自己屋企的學校就變得更重要，因為返學交通時間都少d，起碼可以俾個女瞓多小小。仲有，想和老師多溝通 (投訴) 都方便d .......... (其實咁係唔好的，好消極的，sorry!)
我有朋友參加小一統一派位，又名"大抽獎"，因為學生無需面試，一切由電腦抽簽決定。結果派左去一間唔係幾好的學校。呢間學校真係唔駛去睇都知麻麻地，因為連網頁這種"基本功"都係差人幾皮。
點解學校會搞成咁﹖ 係無錢無學生先搞成咁，還是因為搞得唔好先無錢無學生﹖
講到香港的學校又諗起"霸權"同"貧富懸殊"，因為香港現時的教育都好似都有種霸權係到，因為名校就收極收唔哂，其它學校就爭崩頭搵學生。有能力讀國際學校的有錢人就能夠受到較好的教育，無緣或無錢的就讀"普通"學校，被受學業壓力折磨，最終只能繼續成為奴材。
不過話時話，呢種咁樣的制度又幾有好處喎，因為有錢人唔怕請唔到人，大把人在填鴨式教育下變成智障，爭住做奴才。而窮人以為自己有書讀就有機會脫貧，以為十二年免費教育就係好，其實就靠讀書"上位"或脫貧根本無乜可能。
呢種咁樣的局面相對能保障有錢人可以繼續有錢，窮人繼續窮，是絕佳"維穩"的政策。
所以我話中國的領導人係有大智慧，而香港的高官就 do a good job，well done!
64民運 ﹖ 無咁既事。sorry 呢句新d："你想要幾多錢先肯"算數" (擺休)﹖"
p.s. 本人只去了住所附近的幾間小學，加上女兒天性活潑較難容入一般傳統學校。不排除有不少非名校是政府資助但仍然是很好和適合 貴子女的。上文只是借題發揮，無需認真。
沒有留言:
發佈留言