籃教教練的寫照

鬥波唔係好好玩的嗎﹖

今天教籃球，有三個學生講：”阿Sir，我唔想鬥波。” 我可以做什麼呢﹖迫她嗎﹖迫唔到的，因為她唔想打，你可以做什麼﹖罰佢跑圈﹖同佢講，咁妳以後唔好再參加籃球班﹖咁樣已經少人的籃球班就更少人。

同一班，有一個連拍波都拍唔到的小六學生。什麼叫拍波都拍唔到﹖就係拍拍下個波就會停那一種。手好似樹枝，單手托住個波，伸直就會跌落，射唔到波，又走唔到籃。但他不是第一堂來的，來了好多似。我叫他回家要跑步，他有做，我以經好滿意。但全班都識走籃，他卻唔識。理佢，我冇時間，唔理佢，佢一定會死。一班十二個，點樣兼顧﹖

同一班，有一個運球天才，可以兩隻手插花，做 Jordan Move ，當我做一些容易的球感練習，他感到無聊，當我做一些難的，其它同學就嗌救命，同一班，我會俾四種唔同難度的東西。

同一班，有個球員行路會歪，一隻腳長過另一隻腳，行路不平行，跳唔起，兩腿一起跳就會變成前後腳，又會向前衝。最慘佢好要面，唔衰得，但卻沒有恆心去練習。叫佢留意姿勢，佢會聽，但卻可能因為天資的問題，練一會就會忘記，好快放棄。上課時很不集中，經常跟其他同學傾偈。他跟我已學了差不多三年波，你問我佢有沒有進步﹖我諗佢係進步好多的一位同學，但無論佢點努力，佢無法比正常同學的進度。還有他爸爸2年前意外過了身，叫他不要打波嗎﹖佢什麼都沒有的了。

同一班，仲有小圈子，女仔，佢同另一位同學是姊妹花，所有東西一定要一齊，唔可以分開，一個性格好习，你話佢乜野，佢都會有理由解釋。有一次完左訓練班，(9課一期) ，佢大大聲話：”好野，以後唔駛上籃球堂!” 你會唔有d Hurt?
其實都Hurt 慣，我教甲組，教會，中學，小學生，其實邊有人係專心聽你講﹖每一次總有人傾偈。小學生會好小小，因為你可以罵佢，中學生，成人，你話佢都哂氣。唔尊重就係唔尊重，點教﹖

同一班學生，還有未來香港隊，一個六年班的學生，父親是警察，喜歡打籃球，又是球証，陪孩子打波。小朋友可以射到三分，連入罰球十球。他好努力練習，也很認真，但太看重勝負，打波好狼，許多同學都怕了他。

最慘係大部同學都是來玩，沒有那位同學真正想打好波，連我都唔知佢地點解會來。曾經有一位話阿媽叫我繼續參加。

有正常動機，好似鐘意打波，少之又少。

呢d就係香港籃球教練的寫照。

呢班小朋友，有沒有機會拿學界比賽冠軍﹖你估﹖

大家唔好以為學校唔支持，相反，如果唔係學校支持，幫手去招募學生，連現在有的十二個學生都會無。

點解要搞私人訓練﹖因為一個老師對十二個人，個個水平唔同，炒埋一碟，真係無法子教得好。

我想做好d，唔想”是但”。

但沒有什麼 way out. 如果你有，告訴我。