講下我個仔先，我仔佢宜家七歲，讀書唔係好醒，運動唔係好叻，但人就算勤力。我要求佢隔日就要跑 treadmill ，隔日就要做 Burpee 同 sit up 佢都無話推搪，好多時候我無監控住佢都會自己去做。所以有呢個仔仔我其實好開心，又好"方便"管理，唔似我個女咁激氣。
不過我仔佢都會激到我扎扎跳既，最經常的導火線就係佢踢波的表現。兩日前我同佢去練波，在比賽練習期間佢寫左三球，每一球都係射俾個龍門，每一次都係射中間，個龍門就一定係唔該佢啦。我真係激到死，因為我每一日同佢係屋企練波都係教佢要射個角，我仲要放左個大水桶係龍門中間，等佢無法子唔射個角。點估到佢去到練習就會搞成咁。
再上次比賽仲離譜，佢係底線自己控住個波，前面無人迫佢，佢竟然將個波傳俾對方的球員，我再講一次，係傳俾對方的球員，唔係誤傳，係傳俾人。當時我真係心裏面"媽媽"聲，因為我都唔係對個仔要求咁高話要佢入幾多個波，我只係要求佢唔好做得太差，點知佢竟然交波俾人。
我當然事後問佢做乜，但老例佢都係解唔到，當時無人迫佢，對方離佢有6、7個人位，佢都會做錯決定！仲有，佢傳錯嗰時已經係差唔多完場，你話緊張都唔係最後一分鐘啦！我真係死。
呢個故事令我明白點解小朋友係好危險，佢地係可以做一啲野完全唔經大腦。我亦深切認識到人的有限，盡管我點努力去訓練我仔，佢的發展並唔係我可以操控。我只能夠好似一個農夫咁勤力耕種，但有無收成就真係睇個天。
今日有個"靈感"，以前成日羨慕人地啲仔女係天材，好多野父母唔駛擔心，但我突然間覺得其實最開心係能夠同自己仔女一同成長，陪佢地一齊努力，呢啲父母先能夠感受到父母的偉大。雖然我唔知仔女將來的成就係點，但好肯定的是今天和他們一起努力，就是今天最大的快樂。
我啲足球技術係咪好好？哈哈！
最後提自己一句，謀事在人，成事在天，我見到個仔發傻都唔好咁慶啦，因為呢啲都唔係我可以改變，惟有等佢慢慢大，希望個腦第日好啲。
