大浪西灣驚險之旅

周日和朋友一家人去了大浪西灣。

早上返了教會聽了一場悶道後，便和朋友一家五口去行山，他們一家包括一個六歲小男孩和一個四歲小女孩、工人和父母。我則一家連埋工人四口。我們分別坐了兩部私家車去到北潭涌公眾停車場集合，時為下午一點。

由於天朗氣清，公眾停車場爆滿，但可幸有一私家車離開，我們便先泊了入去，朋友的車也在不久後到達，又剛好有車離開，又找到車位。原來有一些車早上來玩，中午便離開，找車位不算難。

大家去了個廁所後便一齊搭的士入去禁區裏面的大浪西灣涼亭集合。(私家車是不能駛入的)

朋友先坐的士，我坐後邊的一架，點知我架的士行一條路，朋友的的士行另一條路，我們電話聯絡，初時以為我架的士的司機想兜我路，點知傾多兩傾，原來朋友的的士行錯路。最奇的是那的士是綠的，泊在北潭涌的士站，佢地應該好熟路。

我們先到達，朋友隔了十分鐘才到，我問佢個的士司機係咪想玩野，因為朋友已經問左佢幾次去西灣亭係咪呢條路，個的士佬仲答"係"。朋友話應該唔係，加上我架的士行第二條路，最奇係因為得一條路去西灣亭，根本無第二條路，咁我就話："咁佢係咪老人痴呆﹖" 朋友答："可能係"。個阿伯都有六十歲。我同朋友都係俾左$40的士費。

去到西灣亭後時為約2:30，我們開始行入去大浪西灣，條路我覺得幾好行，不過就有D上上落落，不過因為我地又唔係趕住，所以慢慢行，我覺得幾舒服。

點知我個工人行行下好似頂唔順，佢一直帶住我個2歲女，有時抱下佢行，我則揹住個大冰袋，裏面放左冰塊和凍飲。我見勢色唔對，就同個工人交換，因為我個袋一定無個女咁重。交換"行李"後，大家又行左一段路，我個工個樣仲有D火氣，大嗌我唔知拿D乜係個冰袋裏面，話好重好重，發哂脾氣咁款。但係人地個工人就拖住架"私家車" (有碌行李喼)，仲行到飛咁快。

結果我抱女再加埋個冰袋，俾個工人單挑自己算。我個工人都係四十頭，唔算係好老，不過長年好食好住，條腰就應該有29至30寸粗。

一路行到去西灣，手抱兩件大行李，足足行有1粒鐘，我發覺我的體能真係幾好，因為完全唔覺辛苦，仲好有力。

去到大浪西灣，原來那裏有士多，有山水豆腐花食，又有凍飲，我先發覺自己有D"戇居"，托左咁多汽水入來，但係惟有笑笑口扮勁，話當健身。我地坐低食豆腐花，飲凍豆漿，但係D豆腐花好"鞋"，一D都唔滑，認真麻麻。

之後我就同朋友去釣魚，游水，個工人同太太就陪女玩，同埋坐係太陽傘下"回氣"。

玩左2粒鐘，我地就返去，沖埋涼仲一人一個公仔面，然後約6:30開始行返原路返出去西灣亭。

我初時以為太陽曬，我個工人頂唔順，點知返去個程佢又頂唔順，我當然係表演鐵金剛，由頭抱女抱到出去西灣亭。由天光行到天黑，我就未驚過，因為行石屎路之麻，天黑最怕係蚊，但係我地都擦哂蚊膏，一口都冇咬過我。沿途個女就有點怕，猛咁叫"姊姊"，但係佢唔知姊姊宜家已經"想死"，只有爸爸救到佢出去。

最搞笑係我地出到去差唔多冇哂水，因為我個工人趁我見唔到時掉左我D冰種- 結冰凍水3枝，可能因為佢嫌重。

出到去西灣亭以為可以搭的士走，因為入來的時候好多車係到等，但係點知見到二三十人係到，天色黑矇矇，個個拿住手提電話，電筒，仲有.................................就係一架的士都冇。

如果要行番出去，我諗起埋三粒鐘。

大家都拿電話出來諗住call的士，點知全部都冇訊號，係個死位，朋友想拿大陸台中國移動的線，點知都拿唔到，結果一有的士到，大家就湧出去，場面有小小混亂，我望唔到老婆個樣，因為太黑，但係我估佢一定係黑起番面。

我朋友話唔駛擔心，因為的士出番去就會報俾其它司機朋友知"有景"，好快會有車到。佢仲大大聲咁講："有車你地出去先，最多我同 Henry行番出去。"

我聽左就諗起廿年前我同朋友半夜一齊由浪茄灣揹住大背囊行5粒鐘返出北潭涌的日子，講真個句，真係驚都未驚過，而且個女剛剛又食左面，有排都未肚餓。

不過當年同宜家最大的分別是，我朋友宜家已經有一個大肚腩，仲有兒有女，每天都要經歷許多的生意壓力，因為要擔起一頭家。

但係D阿媽就哽係唔係咁諗啦。佢地貴貴都唔介意，有車就要出番去先。

最後我地係靠入來的的士幫我地用的士台call 車，仲要講係出到去沙田而唔係出番北潭涌，佢地先肯入來。

朋友讓我一家人出去先，我都好想多謝佢，因為佢真係好有義氣。本來我地諗住係北潭涌等埋佢先走，但係佢一上左的士就打俾我話："夜啦，今晚唔好一齊食飯，你地同BB走先啦，唔駛等佢啦。"

就係咁我地就走左。

總結今次的行山經驗，我學左一件事，就係要照顧別人關心別人，你首先要照顧好自己先。

好似我個工人，本來諗住佢係來照顧個女，點知仲要照顧埋佢。

回想起我返教會多年，經常叫人讀經，叫人去關心和愛別人，但係就冇叫我們要關心和愛自己，沒有叫我們要努力做好自己的工作，擔起自己的責任，照顧好自己的身體。

今天許多的青少年基督徒，雖然口裏"主呀!主呀!"，又返教會又返團契，但在學業和事業上卻做得不好，身體也肥胖，他們不但沒有成為別人的祝福，反而成為了社會和教會的負擔。

如果我身體狀況不是很好，我相信我亦冇能力抱住個女行番出西灣亭。

其實每一位做父母的，都應該明白愛惜自己的身體是很重要，閒時多做運動，少睇電視，將來兒女長大了便能夠和他/她一起去玩，否則只會埋怨兒女不喜歡和自己玩，又或只可以做靜態的活動，白白浪費了上帝創造給人的美麗大自然。

註：相片不是我影的，是網上借來的，如有問題，請電聯本人刪除。