睇醫生的震撼

今天去睇醫生，係又去睇醫生，係又又去睇醫生。

我有病，大家都知﹖唔係呀!

上星期我個籃球隊學生問我背脊做乜一"達達"，我就話佢知其實我有汗斑。

呢個係皮膚病，亦都係職業病，因為戶外工作，四五個小時流汗，又乾番，又流汗，呢個病好多年啦。跟左我好耐。

呢個病唔痛、唔癢，又唔會傳染，最難睇係當流汗後會變成紅色，但係唔除衫就無人見到，之後又會正常番，不過由於皮膚的色素會因為有微生物寄生而有不同色素，係難睇啫。

所以我都無理。

剛剛去完緬甸，那邊睇醫生一次要五元美金，即係$40港元。對他們已經好貴。

有一次突然間諗起我有免費醫療保險，點解唔去睇下。就係咁去左睇專科醫生。

醫生望了兩眼，用支棒刮刮下，話我知呢D係唔會傳染，連衫都唔駛消毒，番去食藥同埋擦藥就得。

我走左，等拿藥，埋單睇一睇張單，嚇到我傻左，成為$1,330.-。

第一次睇專科，我以為最多六、七百元，心中好唔安落，因為為左一D無傷大雅的小病，我駛左千幾蚊。

雖然我唔駛俾錢。

但係未完，去到登記處，護士話："醫生想下星期想再見你。"

一星期後，我又睇完醫生，成為$1,100.-接住護士又話：""醫生想下星期再見你。"

今天係第3個星期，我又睇完醫生，今次好d，成為$770.- 因為今次無開藥食，得藥膏，接住護士同我再約，日期係十月中，約一個月後。

就係咁，為左醫一些一"達達"唔好睇的東西，我用左三千幾。

雖然我一元唔駛俾。

第一次睇的時候，我覺得好貴。

第二次我已經適應左，覺得係咁。

第三次我已經無感覺。

其實人對於貧窮，對於什麼是貴，什麼是抵，其實亦是相對的感覺。

別人去睇醫生要排街證，我係駕私家長去，有梳化坐，有水機。

我去睇醫生其實相對應該係一種"享受"。

但係有時自己太幸福，唔知道。

幸福，是那些會睇到自己有的而感恩的人。

........................................

附帶一提，由於醫療保險的關係，我去睇醫生，醫生對於治療成本，其實都相對不大重視。我無感覺醫生有一份關懷，就好似機械人。我不知道若來應診的人較窮，他會不會叫他睇少兩次呢﹖又或如果我嗌窮，可不可以少睇兩次，他又會給我什麼面色看呢﹖

現在的醫院有時候會寫"歡迎查詢醫療費用"，但醫生變成若你不問便不會講，這種模式好嗎﹖窮人要得到醫治，我相信真係要受好多苦，因為醫生要下下quote 價，會煩親佢吧，不如趕你走，叫其它人醫你。

唉....唔識講...