要孩子讀書，還是要快樂? (幼稚園面試記)

今天同一天內帶了女兒去了兩間幼稚園"面試"。

第一間屬傳統的幼稚園。

一走去有穿著整齊化哂裝的老師在門口簽到，在領我們入去的過程中老師不停的微笑及歡迎我們，並引領我們去一間較大的房間，那裏坐了約六七十位家長和小朋友。然後是來一個標準的學校簡介，有 POWERPOINT ，由主任介紹校長出場分享的那種。

第一個項目是祈禱，因為是教會辦的幼稚園，接著是校長讀校訓。校長在讀的時候，卻中間停了，可能因為唔記得左，又或者係啖上頸，校長有小小尷尬然後講埋下半截。校訓係："教養孩童使他走當行的路，就是到老也不偏離。"

講完一輪，主要係介紹校內設施，教學方法等，對於一貫失憶以保持我仍然有足夠 RAM 運作大腦的我，之後已完全唔記得佢講過乜。

我同阿女同阿媽跟住就填左一份問卷，內容係問關於我個女最鐘意食乜，玩乜，其中一樣我地有填的係西瓜。

我個人覺得份問卷幾好，因為從無問阿媽同阿爸係做乜，收入多少。

之後就係等面試的時間，我地可以在學校內四圍玩。

每一個玩的地方都有老師在，其中有一位只係識用普通話講野，我就好奇怪咁問佢，點解你唔用廣東話，佢話佢教國語的。我心諗，如果家長唔識講普通話，咁你係唔係繼續用普通話同人溝通﹖

後來我發現唔單止有一位外語人，仲有一位齋講英文的老師，佢頭髮係金色的，不過佢唔係鬼佬，只係頭染金。佢都係全場未講過廣東話。

呢間學校好明顯想俾我地知佢地有老師用英文同埋普通話教學。

玩左半粒鐘後，就有人嗌咪叫阿女入去一間房面試。間房裏面有四張枱，每張有一位老師正負責見一位小朋友。我地就坐係最角落那張枱。

負責面試的只是一位老師，佢都幾靚女，帶左手鐲，介子，指甲油係金粉那種，幾 Yeah 下，不過笑容幾開朗。她坐在枱前，拿了一些玩具同小朋友玩，叫阿女推車仔，又拿張圖card 問阿女知唔知係乜，跟住又拿左個杯叫阿女講係乜，阿女雖然唔識講，但係佢話："屋企有呀!"。

我最想講的是老師問了一個我阿女完全無反應的問題。

老師拿左一"介"玩具西瓜，呢"介"西瓜係三角形，綠色皮，紅色肉及有"核"的那種。阿女望來望去都答唔到係乜。(雖然之前我地份問卷填左阿女鐘意食西瓜。)


原因係阿女食的西瓜從來都係工人切好的西瓜肉，更加係無核那種，(宜家都好似好少有核西瓜喎!) 西瓜皮都已經掉左入去垃圾桶，阿女見過的只是大大個，圓碌碌的西瓜，所以結果佢唔識答， dead air左!

但係香港有多少人會俾一"介"西瓜一個兩歲大的兒童食呢﹖

呢個問題，我諗呢間幼稚園老師都無認真諗過。但我唔怪佢，因為係我咁聰明先會諗到。

面試完之後我冇乜特別感覺，因為我唔擔心阿女，佢實在太聰明，就算有一題答唔到，佢都肯定叻過好多小朋友。

最後要彈一彈呢間學校的原因是，他們的佈置實在太唔能夠使我信服佢地係專業的幼稚園，因為我見到有好多兒童能夠雙手觸及的位置都擺放左一些唔應該放的東西，例如在門口的"自然閣"，那裏有像魚缸的東西，還有一些可以被拉下來的東西，這些在許多房間都可以見到，明顯係管理不善。

或許他們是因為今天要面試才特意佈置的，但我最唔鐘意的就是這些東西。

但總括而言，這間學校不算差，只不過我個人有一些地方不大滿意吧，其實我相信好多學校都係咁上下。

最後又要讚一讚呢間學校，除左份問卷冇問家長背景外，呢間幼稚園都真係有實力同誠意，我地俾左$20.-面試費，走的時候拿了一個禮物包，裏面有3個波仔，一個不倒翁，一把扇，一盒泥膠，總值起碼$50! 所以絕對係物超所值!

明天再分享第二間幼稚園面試經歷。