寸人唔易做

好多人話我好寸，我最記得係有一位教會朋友曾經話俾我知我好叻彈一樣野，我以為佢讚我識結它，點知佢話我最叻"彈人"。

不過諗落佢又幾有道理。

我真係係呢方面有天份，如果我讀文科，我相信我唔會差得過黃毓民，到宜家我想追都追唔到，因為我的中國歷史和文學修為真係好屎。

作為一個寸人，真係並唔簡單。

要寸得起人，自必然要好努力，

因為如果你亂講一通，無人會話你寸，識講粗口的人，亦只係粗鄙。

我經常都講："你唔該唔好得把聲，做朋友唔該唔好凈係識幫人祈禱。"

但係我身邊好多呢類"盲丙"，我寸完佢地，佢都仍然係"依然故我"，

所以我會少見呢d人，因為於我無益，使我"哂氣"。

每次我講"你唔該唔好得把聲，做朋友唔該唔好凈係識幫人祈禱。"的時候，

我就會提醒自己要身體力行去幫朋友。

有人在我的網誌上給我兩個字的回應："Too cynical"

其實呢個世界上有咁多網誌，唔啱 feel 就行開d，無人會罵你，寫兩個字，又唔講下到底你覺得邊 part 有問題，呢d回應我都唔知點搞，因為我想改善都無從入手。

另外又有一d "五毛黨" 來我的網誌"插"我，佢地寫左水蛇春咁長的東西，真係唔好意思，我用一隻手指，呢幾百字的"肺腑之言" 就直接上左天堂，哂左你d時間打，真係 sorry 喎。

其實呢種人都幾 Stupid，以為我真係會俾隻癲狗係我屋企亂吠﹖

雖然我知我寸，但係我真係好鐘意同d 寸人傾偈，因為佢地往往可以刺激我的腎上腺素，使到我腦筋更靈活。

我以前教過的甲二組球員，裏面有好多個隊員都寸到爆，但係我真係好鐘意呢d寸人，因為佢地往往係最具"實力"的球員，因為佢地唔輸得，俾我寸番佢之後就會博命去打，如果唔係當年點拿到甲二的亞軍﹖

基督教教人對人善良，我絕對唔反對，但係同樣地，寸並無犯罪，就好似人人有個性一樣，你會鐘意睇的藝員，都會係因為佢地有自己的風格。

所以我開始怕同o個d永遠附和你，永遠唔會俾反對意見，永遠都係聽就算，唔啱聽又唔會出聲的人一齊，呢d人會使我智商下降，成為一個白痴。

而教會中最多呢種人，就算我話埋俾佢知："我唔會嬲"，但係佢地都係唔敢講真心說話。

我認為呢d係叫"虛偽"。

p.s. 周五晚上籃球聯誼會有一位委員同埋職員以"私人名義"和我食飯，欲知後事如何，請密切留意，不過筆在我手，我唔想寫你都吹我唔漲。