栽了!

畢業後做了好幾份工。

第一份是無線的綜藝節目部編劇，當時我因為自己記性唔好，用錄音機錄了編審叫我改的東西，但編審好像玩我咁，每一次都叫我改另一樣東西，同一篇稿改了三次，最後我頂佢唔順，我叫佢唔該妳聽番錄音帶呀，妳上次根本無叫我咁改，妳係咪明玩我呀﹖那個女編審當場喊左出來，因為我寸爆左佢。而她針對我的原因是她是中五畢業，而我是大學畢業。

之後我就知自己的第一份工"栽了"。之後有朋友告訴我這個"經典"故事一直在TVB綜藝部留為"佳話"。

第二份工去左報館做，算係ok，因為做 Management Trainee ，所以好似學生咁，人人教你野，又無乜實際野做，但後來因為有第二間廣告公司請我，自己選擇左走人。呢份工最搞笑係我識左個同事，原來佢暗戀我中學識左五年的舊同學，最好笑係我一直唔知我老死有個女粉絲，今次俾我捉到佢，到宜家我都仲會拿來笑佢，今次是我的舊朋友”栽了”在我手中。

第三份工去廣告工司做客戶服務，同期認真信主，周六日放假，所以開始帶教會球隊。份工叫做唔錯，無人迫害我，但最後都係要走，原因是”栽在”女朋友手中。青春期發育，拍得耐就嫌悶，自己問題，絕唔係有第三者，不過認真要講，第三者或者都係有，佢個名叫”籃球”。

第四份工做展覽會公司，一入職就發現坐我隔離，又係初入職那個"肥肥"人工高過我，但係做野”屎”過我，原因係我係”浸大”畢業，佢係”中大”畢業，當時浸大都"水水地"，因為剛剛升格做大學。雖然我條氣唔順，不過因為信左主，日日被人教要順服，惟有當唔知算數。呢份工最深刻係識到個”雞蟲”，佢成日去叫雞，司職公司的”老 sell" (推銷員)。

我試過叫佢放棄叫雞架，但係佢人生閱歷多過我，只嘆我幫佢唔到。最令我唔明白的是，點解佢可以同我講話想同公司中，年過四十，波平如鏡，個樣好似巫婆咁樣樣的行政部單身老女人做愛。可能因為在砵蘭徍的妓女個個都係咁上下，所以我從來對呢味野一d都無興趣，講真我要多謝佢。

後來我離開公司因為已經覺得公司發展唔大，因為貿發局搶哂d展覽來做，而我地做 Project Management 的人，只係負責寫 DM (直銷信)，改稿同覆海外客電郵，無聊都爆，仲要天天講大話，呃人話個展覽會有好多好多買家來參觀，實情我點知d買家會唔會黎﹖咪又係出信邀請，佢地都係 last minute 先話你知到唔到，而唔到就永遠係"例"啦。

唔記得講，我地仲要幫手摺信，因為人手唔夠，次次要寄成三四千封，所以我地有條流水線，成8個人坐哂係會議室，一人一個工序，我都係熟手技工黎架。呢段時光幾開心，因為一邊摺信，大家一邊吹水，因為摺信唔駛用大腦的。

後來去咗銀行做，因為銀行乃"百業之母"，(我覺得呢個四字詞好搞笑，你覺唔覺﹖好少字係以"母"字做尾，除左 "xxx母")，人工高福利好，我的部門是行政部，凈係負責洗錢。我地仲低能到請一個人專門負責分發同登記各部們用多少塊擦膠，鉛筆，file 繩，我地除左未數一盒萬字夾夠唔夠數外，我地乜都會計。當然呢間銀行係華資舊式老土到暴的銀行啦，又個音係"尿"字，明啦!

呢d咁舊又老土的公司就出現左第一個和我衝突的第二代人 (根據呂大樂的"四代香港人")，即近五十歲的阿叔。呢位阿叔係一間大公司裁員出來的，但唔知係唔係華資公司多靠關係，佢成五十歲乜都唔識，連filing 都會錯，最慘係溝通唔到，唔係佢唔識講廣東話，而係佢患有"移動式中風"，即係會行會走但卻等同中風的人，可能係新世紀絕症。

我同佢爆過一次，那時候我真係無知，因為我連得罪左佢都唔知。不過那是初時他新入來的時候，到明白佢為人後大家就平安無事，但當時的老闆都唔笨，無理由請人來"坐"，結果都請走左佢。而我亦開始明白乜野叫"敬老"，就係見到佢做錯，"踏屎"都千其唔好叫停佢，否則佢以為你害佢，你只需要在他一腳屎之後俾紙巾佢，咁你就係好人。

突然聯想起好多老人家做委員的"聯誼會"、"教會"、"總會"，好似同佢都有d似喎，記得唔好阻住佢............踏屎呀!

呢份工做左兩年，本來無驚無險，又到加薪升職時，點知耶穌基督顯靈，良心裏面同自己咁講："你如果仲唔走，你就走唔到架啦，因為呢到人工高福利好，你唔係決過志話要跟隨我(耶穌)咩﹖" 咁啱當時的查經中組長又帶那段"無人知主什麼時候回來，佢來的時候就好似賊要偷野咁，唔會俾你知幾時，所以現在就要把握機會侍奉神。"

結果呢份工又"栽了"，我未搵到工就辭職，等候神的帶領。最後入左去突破機構做，開始了我的"成聖"過程。

欲知後事如何，請密切留意下期分享。(如有回應想睇，我會寫快d)