我想睇唔到但又睇到的情景

自從搞了個投籃比賽後，我就多了自己去練習投籃，就算下雨我都會抽時間去練習，因為自己能夠從自我訓練中認識訓練所需要的技巧和拿到一些經驗。

位於我家附近的一個公園內有一個籃球場，我經常看見一些穿白恤衫長褲皮鞋校服的年青人，他們在食煙，打波，也有女孩子。我則在另一個場打，互不影響。

留意一點，公園是不準吸煙的。工作人員當然無理。

昨天我又去練習，練到一半時這班人又來，有五個人，又是穿校服，有女仔，他們說要和我鬥波。我本來唔想，因為我要練投籃，但他們說："鬥一場啦! "

為免拒人於千里，我便和他們打，也好讓我了解一下現在的年青人。

其中一個打得較好，運球快，但係全部係一打一，不傳球，每次都係佢射，喜歡嗌犯規。另一個施施文文，態度幾好，還識講："你射得好準喎!" 另外幾個係"香燭"，非常瘦，打波時好似柱香咁插係到唔多移動。

全部的人的態度都係"求求其其"，沒有一個係認真 ，另一個可能是他們已經好認真，不過我誤會了他們唔認真。

打完一場後我說唔打啦，輸左那一方的其中一個好想報仇，所以堅持要打多場。我話："你地都唔認真，打黎做乜﹖" 那一位立即說："今場認真啦。"

佢原來都知自己唔認真! 咁我就話："好啦，打多場。"

其中一位隊友為了要認真，竟然脫下鞋子，淨穿對襪。最攞命是他將對鞋棄置於場內的三分線上。我望了一望那對阻住全世界的黑皮鞋，不過無講野，也無拿開。

沒有穿鞋的隊友當然仲慢過之前啦。

打左幾分，又係咁：求求其其。唔知係唔係我睇唔出佢地認真左呢﹖

進攻時無人走位，無人交波，我中途嗌停："我話大家都唔認真，咁樣打有乜意思，唔打啦。"

之後他們走埋一邊，坐在長椅上抹汗，其中一留下來"埋齋"，我便和他傾兩句。原來他們在附近中學讀中二，考完試。我告訴他若喜歡打籃球就要苦練，細時唔練大時就唔駛練。"埋齋"後他們便走了。

我望過去長椅，剩下一位婆婆在掃地上七八張散落在不同位置的紙巾。

我向婆婆說："下次叫佢地自己執番嘛! " 阿婆望住我面有難色，唔出聲繼續掃埋地下的白色紙巾。

...........

其實我有諗過可唔可以訓練佢地打籃球，但係我的教會球隊在長沙灣，無可能帶佢去，加上水平差太遠。

我自己再諗，其實上面的說法只是藉口，最主要原因是我覺得他們已經離開"正常"太遠了。他們需要的動力並不存在，因為打波時他們沒有一份認真和追求，我根本帶唔到佢番教會球隊，他們對籃球並沒有追求。


......

為了"避開"這些年青人，今天我去了另一個籃球場，那裏有三個籃球場共六個框，因為我希望的只是自己可以練射波。

同樣地，我又見到一班五六個的青少年，穿涼鞋打波，也是求求其其，也食煙。

但公園也是禁煙的。

....................

長遠來說正生書院其實應該好好生意，有可能好似現在的教育事業咁商業化，因為這些小羊如果沒有人幫他們，好可能最終都會踏上吸毒這條路。

正生將會繼補習學校更興旺。

我建議梅窩居民子女有優先權入讀正生，將來香港的家長會紛紛為了子女有"學校"讀而"孟母三遷"，搬哂入去梅窩。

..................................

我可以做乜﹖

唔係要我幫佢地啩﹖

我有個女同個仔要搞啦。

我諗惟有俾多個題目俾"全球禱告日"啦。

唔係平反六四，應該可以代禱啦。